Madi 26 me 2026, State House Massachusetts la te anvayi ak son fanfa Melrose High School la. Yo t ap jwe pou youn nan pa yo, Frantzdy Pierrot. Yon atakan ekip nasyonal Ayiti a ki te grandi nan Melrose. Pandan li te kanpe devan, Gouvènè Maura Healey te deklare jounen an “Jounen Frantzdy Pierrot” nan tout Eta Massachusetts la.
Gouvènè Healey pa t kache kote kè l ye. “Mwen konnen mwen se gouvènè epi mwen pa sipoze chwazi yon kan, men annou onèt,” li di moun ki te nan sal la. “Jodi a, mwen pral di, ‘Vive Haïti.’”
Konseye Vil Boston Ruthzee Louijeune te make jounen an tou. Lyetnan Gouvènè Kim Driscoll, reprezantan FIFA ak aksyonè MLS, ansanm ak ansyen antrenè ak kwipye Frantzdy yo, epi papa l, Destine Pierrot, te prezan nan State House la. “Mwen tèlman fyè de li,” papa l di. “Mwen fyè de tèt mwen, mwen fyè pou peyi a.” Brian Bilello, Prezidan New England Revolution, pa t kache admirasyon l pou Pierrot. “Ala yon jwè estraòdinè li ye,” Bilello pataje pandan seremoni an.
Gouvènè Maura Healey make Jounen Frantzdy Pierrot bò podyòm nan, fanfa Melrose High School la sou eskalye a dèyè.
Onè sa a te rive nan yon moman espesyal, kèk semèn sèlman anvan Ayiti tounen nan Koup di Mond lan pou premye fwa nan 52 an. Se te premye aparisyon peyi a sou sèn mondyal la depi 1974.
Le 13 jen, Ekip Nasyonal Ayiti a te afwonte Ekòs nan Gillette Stadium nan Foxborough, tou pre Boston. Se vil sa a ki te devlope Pierrot kòm jwè Ozetazini.
Se yon ti kras moun ki konprann reyalite timoun ayisyen yo ap fè fas avè l chak jou. Istwa Pierrot reprezante rezistans ayisyen yo devlope nan lavi. Li te demenaje pou Boston lè l te gen 11 an. Men, li te fèt an Ayiti, kote li t ap jwe nan tè pousyè san boul, san soulye ak san teren. “Nou pa t gen yon boul foutbòl ni soulye foutbòl, kidonk nou te oblije fè pwòp boul pa nou ak chosèt epi ranpli yo ak fatra oswa yon pakèt rad pou fè yo won pou nou te ka jwe,” Pierrot di. “Se te difisil, men se te plezan.”
Nan Melrose High School li te jwenn teren, antrenè, ak yon ekip. Karyè jèn li an pa t senp. Li te jwe nan Melrose High, Northeastern University, ak Coastal Carolina, epi yo te draft li nan MLS anvan li te kòmanse karyè pwofesyonèl li ann Ewòp.
Kounye a Pierrot se twazyèm pi gwo butè nan istwa Ayiti, ak 34 gòl pou Ekip Nasyonal la. Gouvènè Healey te raple sal la sa, epi li pa t kache espwa l pou l ta byento vin nimewo en.
ounen an nan State House la pa t sèlman sou konbyen chemen Pierrot te deja fè. Nimewo 20 Ekip Nasyonal Ayiti a te raple mond lan li reprezante opòtinite. Se konsa, li te anonse FOFPI. Yon fondasyon nan non l, ki bati pou devlope jèn foutbolè an Ayiti epi louvri chemen pou klib ak akademi aletranje. Rezònman l te senp. “Ayiti toujou gen potansyèl men pa ase opòtinite,” li di. “Mwen kwè lavni yon timoun pa dwe depann de kite lakay li. Fòk gen opòtinite kote yo ye a.”
Pi gwo eritaj la se pa sa nou reyalize pou tèt nou, pi gwo eritaj la se sa nou bati pou lòt moun.
Atakan ekip nasyonal Ayiti epi Fondatè FOFPI
Fraz sa a se lide ki nan sant fondasyon an. Pierrot te klè li vle bay lòt moun sa li menm pa t genyen. Sa ki te manke l epi li te oblije aprann nan chemen difisil la. Atravè FOFPI, l ap bay akonpayman, ekspozisyon, ak jesyon karyè alontèm pou tout moun ki fè l konfyans, ekip li, patnè li yo ak entansyon l yo. Tout sa Pierrot ap travay pou li se lavni ak devlopman talan foutbòl ayisyen atravè lemond. Li vle bay foutbòl tounen sa foutbòl kontinye ap ba li.
Frantzdy ak fanmi l ak ofisyèl yo nan biwo Gouvènè a, drapo Etazini ak Ayiti dèyè yo.
Anfans Frantzdy te separe ant de mond, Ayiti ak yon dezyèm kay nan Massachusetts. Toude te kanpe nan sal la pou selebre vwayaj enspiran l. FOFPI se repons li bay difikilte ki te fòme l yo. Li vize bay timoun an Ayiti teren, antrenman, ak opòtinite li menm te oblije travèse yon oseyan pou l jwenn. Travay la fèk kòmanse kounye a. Objektif la se pou pwochen timoun ki gen yon rèv pa rete dèyè epi pa oblije kite lakay li pou l kouri dèyè l.
Frantzdy ap selebre ak fanmi l ak sipòtè l yo nan State House la.
Swiv fondasyon an depi premye kout pye a. Jwenn nouvèl sou akademi yo, 100 jwè yo chwazi yo, ak wout ki mennen nan tournwa a.